(CNN) Ushtria amerikane goditi të enjten një vend në Siri të përdorur nga dy grupe milicie të mbështetur nga Irani në përgjigje të sulmeve me raketa ndaj forcave amerikane në rajon në dy javët e fundit. “Një grusht” militantësh u vranë në sulme, tha një zyrtar amerikan për CNN.

Sulmet, të cilat shënojnë veprimin e parë të njohur të ushtrisë amerikane nën Presidentin Joe Biden, tërhoqën me shpejtësi kritika nga një ligjvënës Demokrat. Zona e goditur nuk ishte e lidhur posaçërisht me sulmet me raketa, por Sekretari i Mbrojtjes Lloyd Austin tha se ai ishte “i sigurt” se u përdor nga të njëjtat milicia shiite të mbështetur nga Irani që kishin qëlluar me raketa në SHBA dhe forcat e koalicionit.

Zëdhënësi i Pentagonit John Kirby tha se sulmet u zhvilluan “nën drejtimin e Presidentit Biden” dhe ishin të autorizuar jo vetëm për t’iu përgjigjur sulmeve të fundit kundër forcave amerikane dhe të koalicionit, por edhe për t’u marrë me “kërcënimet e vazhdueshme ndaj këtij personeli”.

“Në mënyrë të veçantë, sulmet shkatërruan shumë objekte të vendosura në një pikë të kontrollit kufitar të përdorur nga një numër i grupeve militante të mbështetur nga Irani, duke përfshirë Kata’ib Hezbollahun dhe Kata’ib Sayyid al Shuhada,” tha Kirby. “Operacioni dërgon një mesazh të paqartë; Presidenti Biden do të veprojë për të mbrojtur personelin e koalicionit amerikan. Në të njëjtën kohë, ne kemi vepruar në një mënyrë të qëllimshme që synon të de-përshkallëzojë situatën e përgjithshme në Sirinë Lindore dhe Irak.”

Vendi që SHBA goditi të enjten besohet të përdoret si pjesë e një operacioni kontrabandë armësh nga milicët, sipas një zyrtari amerikan. Goditjet u kryen për të degraduar aftësinë e grupeve për të kryer sulme dhe për të dërguar një mesazh në lidhje me sulmet e fundit, tha zyrtari.

Kirby tha se Biden autorizoi sulmet pasi u këshillua me aleatët e SHBA, duke përfshirë partnerët e koalicionit në Irak. SHBA nuk ka fajësuar një grup specifik për sulemt ndaj trupave amerikane. “Ne kemi deklaruar më parë se ne do ta mbajmë Iranin përgjegjës për veprimet e përfaqësuesve të tij që sulmojnë Amerikanët”, tha të hënën zëdhënësi i Departamentit të Shtetit Ned Price, duke theksuar se “shumë prej këtyre sulmeve kanë përdorur armë të prodhuara nga Irani, të furnizuara nga Irani”.

Një sulm me raketa i 15 shkurtit mbi forcat e koalicionit pranë Aeroportit Ndërkombëtar të Erbilit në Kurdistanin Irakian vrau një kontraktor civil dhe plagosi nëntë të tjerë, përfshirë katër kontraktues amerikanë dhe një anëtar të ushtrisë amerikane. Pastaj të hënën, dy raketa ranë në zonën ndërkombëtare të Bahgdad, ku ndodhen shumë ambasada të huaja. Nuk ka raportime për lëndime ose dëme.

Sulmet e SHBA vijnë ndërsa Uashingtoni dhe Teherani pozicionohen për negociata rreth programit bërthamor të Iranit, duke komplikuar potencialisht një proces tashmë të brishtë.