Në vitin 2016, punonjësit e Ambasadës Amerikane në Kubë u sëmurën në mënyrë misterioze: të përziera, të menduarit e turbullt. Tek disa punonjës u gjetën edhe dëmtime të lehta të trurit. Fenomeni u quajt Sindroma Havana.

Njerëzit që punojnë në ambasadat e SHBA në Kinë përjetuan simptoma të ngjashme.

Tani, sindroma Havana është raportuar për herë të parë në tokën e SHBA, shkruan CNN.

Në shënjestër stafi i Shtëpisë së Bardhë

Rasti i parë u zbulua në fund të vitit të kaluar në lëndinën në jug të Shtëpisë së Bardhë të quajtur Elips.

Një person që punonte për Këshillin e Sigurisë Kombëtare ishte sëmurur papritmas ndërsa ecte në lëndinë.

Një rast tjetër u zbulua që në vitin 2019 në rrethin Arlington të Uashingtonit, shkruan GQ-Magazine.

Një punonjëse e Shtëpisë së Bardhë kishte kaluar pranë një furgoni të parkuar.

– Qeni i saj filloi të kishte konvulsione. Vetë gruaja gjithashtu pësoi një dhimbje koke të fortë, ndjenjte fishkëllimë në veshët e saj, fytyra e saj u skuq, thotë raporti.

Mikrovalë?

Të dy rastet janë hetuar nga Ministria e Mbrojtjes, Departamenti i Shtetit dhe CIA. Asnjë shpjegim i qartë nuk është marrë, por CIA ka arritur në përfundimin se sulmet janë kryer me një lloj pajisje me mikrovalë me energji të lartë.

Një shqetësim i veçantë është fakti që sulmet misterioze kanë ndodhur këtë herë pranë Shtëpisë së Bardhë.

Shtëpia e Bardhë e ka marrë seriozisht këtë.

– Ne jemi duke punuar ngushtë me shërbimet e sigurisë për të hetuar këto sëmundje të pashpjegueshme. Sidoqoftë, ne duam të mbrojmë privatësinë e njerëzve, kështu që nuk do t’ju tregojmë më shumë detaje, tha një zëdhënës i Shtëpisë së Bardhë.