Qeveria e kryeministres Sanna Marin (SDP) fitoi një votëbesim në Parlament të premten pasdite me një diferencë prej 91 kundër 66. Parlamenti ka 200 anëtarë, nga të cilët 117 prej tyre i përkasin partive të koalicionit qeveritar pesë partiak.

Mocioni i besimit u dorëzua nga pothuajse të gjitha partitë opozitare – Partia e Finlandezëve të Vërtetë, Partia e Koalicionit Kombëtar, Kristian Demokratët dhe Lëvizja Tani – dhe vuri në pikëpyetje gatishmërinë e Finlandës për t’u marrë me kërcënimet hibride.

Kjo u nxit nga situata e rënduar në kufijtë e Bjellorusisë me Poloninë, Lituaninë dhe Letoninë, ku mijëra emigrantë janë mbledhur për të hyrë në Bashkimin Evropian.

Sipas Finlandës dhe BE-së, migrimi masiv është një operacion hibrid i orkestruar nga Bjellorusia për të protestuar kundër sanksioneve të BE-së.

Në pyetjen e interpelancës të paraqitur në Parlament, partitë opozitare sugjeruan se Finlanda mund t’i përgjigjet kërcënimit hibrid duke pezulluar pranimin e kërkesave për azil dhe, nëse është e nevojshme, të mbyllë kufijtë e vendit. Opozita tha se kjo mund të arrihet duke vendosur klauzola emergjente në ligjin e Finlandës për të huajt.

Megjithatë, qeveria argumentoi gjatë debatit të interpelancës se një klauzolë e tillë emergjente nuk do të ishte e mundur brenda kornizës së Kushtetutës finlandeze dhe legjislacionit të BE-së.