Kancelarja gjermane në pension Angela Merkel nuk do të bëhet Kryetare Nderi e Unionit Kristian Demokrat (CDU), njoftoi gjancia gjermane e lajmeve DPA, duke cituar të premten liderin e Partisë Konservatore.

Kreu i CDU-së Armin Laschet tha për transmetuesin RTL / NTV se kishte shqetësime që një rol i tillë nuk kishte më kuptim.

“Angela Merkel gjithashtu mori vendimin se nuk i përshtatet më kohës. Ne nuk kemi një kryetar nderi. Kjo është një traditë nga e kaluara, që nuk ekziston tani në nivel federal,” tha Laschet.

Laschet, i cili udhëhoqi CDU-në në rezultatin e saj më të keq të zgjedhjeve në shtator të vitit të kaluar, së shpejti do të lirojë vendin e udhëheqësit të partisë. Pasardhësi i tij Friedrich Merz pritet të zgjidhet zyrtarisht sot në një konferencë që do të mbahet online.

Merkel nuk ka marrë pjesë në zgjedhjet e shtatorit, duke u tërhequr nga politika pas 16 vitesh në krye të ekonomisë më të madhe të Evropës.

Laschet theksoi se “Kryetari i fundit i Nderit ishte Helmut Kohl, i cili më pas dha dorëheqjen edhe nga posti i Nderit”.

Kohl, paraardhësi i Merkelit dhe këshilltar i dikurshëm, dha dorëheqjen nga posti në vitin 2000 për shkak të një afere përvetësimi.