Media e pavarur ruse Meduza publikoi një listë të kushteve të paqes të propozuara nga Ukraina për Rusinë, e cila u sigurua nga gazetarja Farida Rustamova. Negociatorët ukrainas thuhet se ua kanë dhënë atë listë dhjetë pikash bashkëbiseduesve të tyre rusë në bisedimet e paqes në Stamboll.

Propozimi kryesor i Ukrainës është të garantojë statusin dhe sigurinë e përhershme neutrale të vendit nëpërmjet vendeve garantuese. Propozimi përcakton Rusinë si një nga garantuesit e mundshëm. Vendet garantuese janë të përkushtuara për të garantuar sigurinë e Ukrainës në rast të një sulmi të armatosur dhe për të promovuar anëtarësimin e vendit në BE.

Rusia ka thënë se ështe ende shpejt për të folur për një zgjidhje të konfliktit, por ka pranuar se për herë të parë ka një listë të shkruar të propozimeve nga ana e Ukrainës.

Kushti 1
Ukraina e deklaron veten një shtet neutral që premton të mos angazhohet në blloqe ushtarake. Ukraina nuk po zhvillon armë bërthamore. Këto zotime mund të ndërmerren kundër garancive ligjore të ofruara nga komuniteti ndërkombëtar. Vendet garantuese mund të jenë, për shembull, Rusia, Mbretëria e Bashkuar, Kina, Shtetet e Bashkuara, Franca, Turqia, Gjermania, Kanadaja, Italia, Polonia dhe Izraeli. Shtetet e tjera të gatshme mund t’i bashkohen gjithashtu marrëveshjes.

Kushti 2
Garancitë ndërkombëtare të sigurisë nuk do të zbatohen për Krimenë, Sevastopolin apo zona të caktuara në Donbass. Kufijtë e këtyre zonave do të bien dakord veçmas nga palët ose do të dakordësohen nga palët e ndryshme.

Kushti 3
Ukraina premton të mos bashkohet me aleanca ushtarake ose të presë trupa të huaja dhe baza ushtarake. Çdo stërvitje ushtarake ndërkombëtare mund të organizohet vetëm me pëlqimin e shteteve garantuese. Këta garantues janë të përkushtuar për të promovuar anëtarësimin e Ukrainës në BE.

Kushti 4
Me marrëveshje ndërmjet Ukrainës dhe shteteve garantuese (në rast të një sulmi ushtarak ose ndonjë sulmi tjetër ndaj Ukrainës në rast lufte), çdo garantues merr përsipër t’i japë ndihmë Ukrainës, e cila është e përkushtuar ndaj neutralitetit, menjëherë pas negociatave ose brenda një maksimumi prej tri ditësh. Negociatat do të vlerësojnë ushtrimin e të drejtës për vetëmbrojtje individuale ose kolektive në përputhje me nenin 51 të Kartës së OKB-së. Ndihma mund të ofrohet nga shtete individuale ose shtetet mund të punojnë së bashku. Ndihma do të ofrohet sipas rastit dhe do të mbulojë mbylljen e hapësirës ajrore të Ukrainës, sigurimin e armëve dhe përdorimin e forcës së armatosur për të siguruar neutralitetin e përhershëm të Ukrainës.

Kushti 5
Të gjitha sulmet e armatosura (dhe operacionet e tjera ushtarake) dhe pasojat e tyre do t’i raportohen menjëherë Këshillit të Sigurimit të OKB-së. Veprimet ushtarake do të reduktohen ndërsa Këshilli i Sigurimit i OKB-së do të marrë hapat e nevojshëm për të ruajtur paqen dhe sigurinë ndërkombëtare.

Kushti 6
Marrëveshja mbron Ukrainën nga provokimet e mundshme dhe rregullon mënyrat për të siguruar zbatimin e garancive të sigurisë së Ukrainës në bazë të negociatave midis shteteve garantuese dhe Ukrainës.

Kushti 7
Marrëveshja do të hyjë në fuqi përkohësisht sapo të nënshkruhet nga Ukraina dhe të gjitha ose shumica e shteteve garantuese. Marrëveshja do të hyjë në fuqi në baza të përhershme pasi (1) neutraliteti i përhershëm i Ukrainës të miratohet me referendum, (2) të jenë bërë ndryshimet e nevojshme në kushtetutën e vendit dhe (3) marrëveshja të jetë ratifikuar nga parlamentet e Ukrainës dhe shtetet garantuese.

Kushti 8
Ukraina dhe Rusia angazhohen për të negociuar çështjet që lidhen me rajonet e Krimesë dhe Sevastopolit për 15 vjet. Ukraina dhe Rusia marrin përsipër të përdorin vetëm mjete diplomatike për një zgjidhje dhe do të përmbahen nga përdorimi i mjeteve ushtarake.

Kushti 9
Palët do të vazhdojnë negociatat me shtetet garantuese për të përgatitur dhe rënë dakord mbi garancitë e sigurisë për Ukrainën, kushtet e armëpushimit, tërheqjen e trupave dhe grupeve të tjera paraushtarake, sigurimin e përdorimit të sigurt të korridoreve humanitare, shkëmbimin e trupave të vdekur dhe liriminm e robërve të luftës dhe civilëve të internuar.

Kushti 10
Palët do të shqyrtojnë një takim midis Presidentëve të Ukrainës dhe Rusisë për të nënshkruar marrëveshjen dhe / ose për të rënë dakord për çështje të tjera të pazgjidhura./IL

About Post Author

admin

See author's posts